UN UFFIZIU DI E TENEBRE VECHJU DI SEDECI SECULI

Eccu un archiviu di 2003 ch'aghju ritrovu è chì tratta di "l'Uffiziu di u Venneri Santu chi si dice...u Ghjovi à sera".
Simu avale in 2007 è l'uffiziu hè sempre vivu. U celebremu in lingua corsa dipoi annu, è hà sensu ancu di più per noi.

Dipoi trè anni a chjesa San Carlu torna ritrova a tradizione. Cusì eri sera hà urganizatu una prucessiò, in chjesa è senza prete. Un mumentu forte è particulare.
A l'occasione di a Settimana Santa, a Cunfraterna di San Carlu creata in u 1640, hà celebratu ghjovi sera « l'Uffiziu di e Tenebre ».
S'elle sò state e cunfraterne prisente in a storia di a cristianità, ancu sì a civilisazione uccidentale e face smarrì, in Corsica è in tuttu u Mediterraniu fermanu sempre vive.
I cunfratelli di San Carlu ùn sò micca un gruppu folcloricu nè ghjente nostalgica, nè mancu integristi, ma sò cristiani chì si sentenu particularmente sulidarii di a cumunità.
Sò omi è donne chì si ricentranu nant'à l'amore di u prossimu. Dice Pierre Pancrazi : « simu laichi, è micca santi. Oghje certi sò fieri d'esse Buddisti, noi simu fieri d'esse cristiani ».

A cunfraterna si cumpone di vinticinque persone da 17 à 83 anni d'ogni classa suciale. Tutti l'anni hè numinatu un priore è a so massima hè : « obedienza ». I membri s'adduniscenu duie volte à settimana è urganizeghjanu una messa cantata misinca.
Anu attività caritative, i cunfratelli sò chjamati per cantà e messe di dolu o di matrimoniu in Bastia è in parechji paesi. Ghjovi sera pè a terza annata di fila, a cunfraterna San Carlu hà fattu rinasce a tradizione urganizendu « l'Uffiziu di e Tenebre », chì cumemureghja a morte di Cristu, quandu Diu diventatu omu cunnobbe u tradimentu, a bugia, a viulenza, l'inghjustizia, a suffrenza, u dubbitu è a morte.

Sò sedeci seculi chì sta ceremonia si praticheghja di listessa manera.

I cunfratelli sò vestuti d'un camisgiu biancu, un curdone neru annudatu in giru à a vita, una mantelletta rossa sopra è nera sottu, u capu hè piattu da un cappucciu neru. Vestitoghja simbolica, u camisgiu biancu riprisenta quellu di Cristu, avviendu si versu u calvariu, u curdone ricorda u mumentu duve Cristu fù ligatu, a mantelletta ricorda u flagellu, è u cappucciu hè simbulu d'umilità.

Cusì vestuti, i cunfratelli cantanu i salmi in latinu è e pulifunie tradiziunale. A ceremonia hè puntellata da e letture è da e laude.

A prucessiò misteriosa si move sin'à in piazza à a chjesa per inturchjà si in chjerchji sacri. À u centru, u priore tene un cirone accesu chì allumineghja tutti i cunfratelli. U lume ghjè Cristu. Pè i cunfratelli, a ceremonia di e Tenebre sò e Via Cruci, u mumentu duve Cristu hè u più vicinu da l'omi. L'uffiziu principia à 8 ore senza prete in chjesa San Carlu, l'unicu locu chì face rinasce sta tradizione.

Riferenza di l'A.D.E.C.E.C in l'archivi : A- C.M. 18.04.03 O.B