Uffiziu di i morti in Castagniccia. Bicentinariu di a morte di Pasquale Paoli

In st’annata di u bicentinariu di a morte di Pasquale Paoli, u paese di Quercitellu hà vissutu un mumentu impurtante è stòricu.

In fatti, e cunfraterne di Balagna, di u Ghjunsani, di a pieve di a Serra, cù quelle di San Roccu è di San Carlu Borromeo di Bastia, sempre impinserite di mantene è di tramandà e nostre tradizioni seculare, avianu decisu di celebrà l’Uffiziu di i Morti in stu paisolu di Castagniccia.

Stu paese fù sceltu per via chì Pasquale è Clemente Paoli, à a so epuca, fecenu parte di a Cunfraterna di San Ciprianu di u Quercitellu.

Dunque, in omagiu à i Paoli, sti cunfratelli anu decisu di fà st’uffiziu in a Casazza di l’anziana cunfraterna.

Dopu avè pigliatu appuntamentu incù i paisani per urganizà a ceremonia, imparonu chì da qualchì tempu l’antica cunfraterna di San Ciprianu ripigliava fiatu.

Tutti inseme decisenu dunque di fà duie ceremonie u listessu ghjornu, u 3 di nuvembre di u 2007.

Prima, a stallazione di a cunfraterna di San Ciprianu cuminciò. A ceremonia celebrata à 11 ore, da u diacunu Petru Ghjuvanni Franceschi, hè stata cantata da parechji cunfratelli. Una ora dopu e campane di a vechja casazza annunziavanu a rinascita di a cunfraterna di San Ciprianu incù i so quattordeci cunfratelli.

À l’attrachjata, a chjesola di San Ciprianu ùn pudia accoglie tutta a ghjente. Mentre una ora, à a luce di i candelli, una settantina di cunfratelli anu cantatu l’uffiziu di i morti.

Mumentu impurtante per e cunfraterne perchè chì st’uffiziu ùn hè guasi più praticatu. Sta ghjurnata hà permessu d’arradicà è di tramandà e nostre tradizioni. Cusì avemu pussutu vede unu di i più giovani cunfratelli (diciott’anni) cantà incù unu di i più vechji.

Dopu à issa magnifica ghjurnata, e cunfraterne prisente anu prumessu di riscuntrassi per altri mumenti impurtanti è di mette in ballu, in ogni pieve, quell’uffiziu ogni 2 nuvembre, ghjornu di i morti.

U Guvernatore 2006-2007
Ghjuvanni Raffini