A Chjesa corsa hè in dolu.
In stu 24 di settembre, dopu avè festighjatu a Madre Universale, si n'hè andatu unu di l'ultimi preti corsi.
Stu prete era impastatu di credenza umana ch'ellu circava à sparghje intornu à ellu. Dopu avè giratu u mondu sanu è essesi messu à u serviziu di i populi offesi, si ne riturnò in la so pieve muntagnola per suminà a so fede in la Madonna d'Alisgiani.
Poi qualchì annata dopu tutt'ognunu fù stunatu di a so numinazione in San Ghjuvà di Bastia. À modu soiu, cun u so spiritu corsu è cun a so fede s'hè messu à a dispusizione di a cumunità bastiaccia.
Aldilà di u prete, ci era un omu primurosu di cultura corsa chì quant'è pussibile apprudava a lingua nustrale, à l'altare quant'è per ciarlà. Omu surridente è simpaticu chì dettu messa passava vulenteri cun gentilezza una stonda di felicità, di risa è di burla.
Cuntà qualchì stalvatoghju è fassi duie rise cun un ochju maliziosu era per ellu un piacè chì forse era una lascita d'un certu "Grossu Minutu" nativu anch'ellu d'Alisgiani. Oghje a Madonna d'issa pieve ch'ellu hà tantu precatu l'accumpagna per l'ultimu viaghju.
Eccu cum'ellu era u nostru piuvanu Fratucciu Ulivu Tagliazucchi, chì per prisentassi à i so paruchjani bastiacci, avia scrittu :
Parlu à l'acelli
quant'è à parlà à i zitelli
Sempre allegru è scherzosu
Di San Ghjuvà la chjesa sò amorosu !
Oramai à fianc'à u Signore stà à l'ascosu.
Ci hà da mancà Fratucciu Ulivu.
Noi cunfratelli di San Carlu, oghje in dolu, vulemu tene u ricordu sempre vivu di u nostru prete cum'ellu era è cum'ellu ci rallegrava u core ogni ghjornu.
Sè vo passate per a piazza di u Mercà, forse infatterete à prete Ulivu chì a si chjachjareghja cun qualchì bastiacciu nant'à l'usciu di u presbiteriu. Sempre cun simpatia, l'omu vi ferà mottu, è l'ochju pienu à malìzia, vi cunterà qualchì stalvatoghju da fassi duie rise …Per chì mutivu si ritrova prete in Bastia, sradicatu da e so muntagne alisgianinche, a saperanu u Signore è qualchì vescu. Fattu si stà chì l'omu si definisce ellu stessu da prete campagnolu, pocu giratu versu u cumbugliu, a frenesia è i lumi spampillanti di e cità.Impastatu da un mondu paisanu chì ùn vole finisce di more, si porta in sè una fede spannata per e loche di u core più ch'è di l'intellettu, una fede primurosa di l'omu più chè di l'istituzione, una fede chì di l'ànima umana ci hà capitu tuttu. Micca scialbata à duttrina secca è ghjalata, ma una fede sèmplice, pupulare, guasi zitellesca, una fede à usu corsu.Bella sigura, u vede anch'ellu stu mondu vechju chì pianu pianu piglia fondu cum'è qualchì battellone ch'averebbe pescu in altu mare, tiratu à l'inghjò da u so propriu pesu. Ma u so sguardu hè quellu di u saviu d'Ascu, di l'Apòstulu ch'hà u sìntimu d'esse statu battaglieru è servizièvule, ghjuntu à a fine di a corsa. Sguardu senza nustalgia, sguardu di sperenza nant'à sti tempi à vene prumessi à rimusci prufondi ch'ùn ne sapemu mancu chì mondu, à strade scunnisciute è nove da scrive per u spìritu umanu.È ùn vi sbagliate, dettu messa s'ella li piace à sente « i paisoli d'Orezza » piuttostu chì qualchì cànticu canònicu è sulenne, ùn hè chì l'omu sia paganu o imbambulitu, mancu à pensalla, hè solu ch'ellu hà capitu chì a più bella cumunione hè spartera d'una stonda di bellezza è di felicità, qualessa sia.Cunfraterna San Carlu, 16 di ferraghju di u 2013.
http://api.dmcloud.net/player/embed/4f3d114d94a6f66945000325/5241afd1947399197d00000e/668aad2de8dd47f8b22f317c9d0b4cbf?exported=1
« Padre Tagliazucchi », un ducumentu di Ghjuancarlu Marcily è Philippe Villaret.Ghjenti, France 3 Via Stella, ghjugnu di u 2003.
